Tíðindi

Frískir og væl nøgdir næmingar fóru til gongu í morgun miðvísir við beinari leið oman í Sandagerð.  Stórur hópur, taldur av  teimum yngstu í forskúlanum, hinum í grunddeildini, teimum í miðdeildini og   næmingunum í  7. flokki; øll sømul hugað  til ein serliga  dagin, pylsudagin í Sandagerði.

Leiðin gekk yvir um Heðinsbrú og oman eftir gøtuni við Sandá, har prátið gekk lystiliga, meðan øll gleddu seg at koma á mál.

Niðri í Sandagerði vóru nógv ymisk tiltøk á skránni. Næmingarnir luttóku í spølum og kappingum, har  rørsla, samstarv og gaman  vóru í hásæti. Hugaligt at síggja stór og smá njóta góðu samveruna í vakra umhvørvinum. Fleiri høvdu spakar við, onnur gróvu við hondunum í sandinum, meðan onkur dittaði sær at gera føturnar vátar. Onkustaðni sóust tjøld og aðrastaðni næmingar við tráðu í hond.

Nakað yvir tíggju  var tíð at fáa sær okkurt gott at eta. Øll fingu snerkt pylsuhorn og Sunkist, og tað smakkaði serliga væl úti í frísku luftini. Prát og smíl, meðan næmingarnir hugnaðu sær saman.

Tiltakið endaði fram ímóti middegi. Næmingar, lærarar og námsfrøðingar kundu fara avstað aftur mettaðir við minnum og snerktum pylsum.

Aftur  ein  stuttlligur  og væleydnaðan pylsudagur í Sandágerði.

Katrin námsfrøðingur hevur tikið myndirnar.