Tíðindi
Hjartamál hjá valevnunum til skúlastýrið
Kunning um valið, valevnini til skúlastýrið í Skúlanum á Fløtum (sett í bókstavarøð eftir fornavni) og teirra hjartamál
Foreldur hava ein stóran leiklut í skúlagongdini hjá einstaka barninum. Tit eru við til at skapa tryggleika, trivnað og læring. Samskifti og samstarv millum skúla og heim hevur tí alstóran týdning, bæði fyri menningina hjá einstaka barninum og menningina hjá skúlanum sum heild.
Samstarvið fer fram í gerandissamskifti millum skúla og foreldur, men við foreldraumboðunum í skúlastýrinum kunnu tit foreldur eisini fáa beinleiðis ávirkan á, hvussu gerandisdagurin í skúlanum verður skipaður. Øll foreldur við foreldramyndugleika hjá børnum, sum eru skrivað inn í okkara skúla, hava valrætt og valbæri. Tað eru Lopfjølin, Guliskúli og Skúlin á Fløtum
Til ber at velja við brævatkvøðu á skrivstovuni á Fløtum frá 5/11 til mánadagin 11/11 kl 13:00
Til ber eisini at velja í høllini á Hálsi sjálvan valdagin.
Niðanfyri her standa nøvnini á teimum uppstillaðu í bókstavarøð eftir fornavni umframt nøkur av teirra hjartamálum.
Kom á skúlastýrisval og ger tína ávirkan galdandi.
Vinarliga
Regin Marnersson, skúlastjóri og formaður í valnevndini til skúlastyrisvalið.
Tey upptillaðu eru:
Annfríð Poulsdóttir Jørgensen, Vatnsoyrarvegur 20
Míni hjartamál eru ein trygg og fakliga fjølment skúlagongd, har náttúra og rørsla hava ein stóran leiklut.
At øll børn fáa gagn og gleði av skúlatíðini, eisini tey, sum í løtuni ikki trívast í skúlahøpi.
Ein heilsugóð kantinuskipan til børn og vaksin.
At teldur fylla minni, so hondskriftin mennist og eginleikin at miðsavna seg varðveitist.
Erla Bech Nolsø, Perskonugøta 25B
Míni hjartamál eru, at okkara børn og ungu skulu trívast og mennast í einum tryggum umhvørvi.
Eg virðismeti munagóða og fjølbroytta frálæru, og at næmingar verða møttir á teirra støði. Skal læring fara fram, mugu næmingar bæði eta væl, sova væl, røra seg og avmarka skermnýtslu. Nakað av hesum fáa vit gjørt nakað við í skúlanum, t.d. við endiliga at fáa kantinuna upp at koyra og framhaldandi at betra møguleikarnar fyri rørslu og spæli. Tískil ynski eg framvegis at virka fyri sunnum, tryggum karmum um okkara børn í Skúlanum á Fløtum.
Heidi Davidsen, Havragerði 1A
Míni hjartamál eru, at arbeiða við trivnaði og framtíðar menning, fyri bæði næmingar og starvsfólk.
Eg ynski at leggja dent á, at styrkja felagsskapin millum næmingar ígjøgnum øll skúlaárini, og at vit áhaldandi arbeiða við at menna fakliga støðið, so vit harvið geva okkara ungdómi bestu fortreytir í framtíðini.
Eg vil arbeiða fyri, at vit hugsa burðardyggar loysnir í okkara tilgongd og læra næmingarnar at taka neyðugu atlitini til umhvørvið.
Harumframt vil eg arbeiða fyri, at rørsla - í breiðari merking - eisini verður ein størri partur hjá almennu breyt og at vit hyggja at góðu royndunum, sum skúlin hevur haft við ítrottarbreytini seinastu árini. Harvið kunnu vit styrkja felagsskapin millum breytirnar í hádeild og skapa betri trivnað fyri øll.
Kristianna Jústinesdóttir Heinesen, Fagralíð 17
Míni hjartamál eru at raðfesta at næmingar í eldru flokkunum fáa betri tíð og umstøður at læra at nýta teldu sum arbeiðsamboð og at endurskoða mannagongdir um teldubrúk í yngru flokkunum.
Til kantinuskipan er, at eggja handlum at fylgja almennum tilmælum um sølu av vøru, ið ikki eru ætlað børnum.
At betra kunning millum heim og skúla.
- Mamma at trimum; eitt í hvørji deild í SáF
Kristian Niclasen, Heygsvegur 12
Míni hjartamál eru at arbeiða við trivnaði hjá børnunum. Skúlastýrið eigur áhaldandi at arbeiða við hesum, við millum annað at hoyra góð hugskot frá næmingaráðunum, fyri at basa happing og betra um samanhald.
Harafturat haldi eg, at Skúlin á Fløtum hevur eina geniala tekju. Tað er stórt spell, at hon ikki verður brúkt. Skúlastýrið eigur at kanna, hvat skal til, fyri at myndugleikin aftur vil loyva at brúka tekjuna.
Til síðst ynski eg at arbeiða víðari við málunum, sum sitandi skúlastýrið hevur arbeitt við. Har ímillum at geva børnunum møguleika at keypa mat úr fína stórkøkinum.
Poula Patursson, Havragerði 4
Nógv børn trívast ikki í skúlanum, og eg vil vera teirra rødd í skúlastýrinum! Eg kenni væl til hetta sum mamma, og tí veit eg, hvat skal til, fyri at barnið trívist.
Mítt hjartamál er at gera skúlan betri fyri ØLL børn, serliga tey, sum ikki passa inn í vanligu kassarnar. Skúlastýrið hevur brúk fyri einum umboð fyri hesi børn.
Eg ynski at umboða Gulaskúla í skúlastýrinum.
Súsanna Reinert-Petersen, Undir Heygnum 35, kj
Mítt hjartamál er trivnaður, tí trivnaður er fortreytin fyri menning og læring.
Fortreytin fyri trivnaði er, at teir grundleggjandi tørvirnir eru møttir. Grundleggjandi tørvir eru td.
Matur og drekka. Tí er tað týdningarmikið, at ein heilsugóð og skynsom kantinuskipan kemur.
Tryggleiki í skúladegnum fyri næmingar, foreldur og starvsfólk. Tvs, at samskiftið framhaldandi er virðiligt og byggir á viðurkenning.
At børnini føla seg vera ein virðismettur partur av sosiala felagsskapinum í skúlanum.
Snorri Patursson, Undir Heygnum 4
Míni hjartamál eru at fáa eina kantinuskipan, ið tryggjar øllum næmingum javnbjóðis atgongd til heilsugóðan og umhvørvinarligan mat í einum tryggum og hugnaligum umhvørvi, har næmingurin í størri ella minni mun er við í borðreiðing og matgerð fyri at stimbra undir eina góða matmentan.
Eitt annað hjartamál er at arbeiða fyri meira rørslustimbran inni á skúlanum, og at nýta náttúruna sum eitt natúrligt lærings- og trivnaðartilfeingi hjá næmingum og starvsfólkum.
Val til skúlastýrið verður 12. november 2024
12. november verður val til skúlastýrið. Høllin á Hálsi er valstaður.
Foreldur, ið hava foreldramyndugleika, hava valrætt.
Seinasta freist at stilla upp er 4. november.
Foreldur, ið ikki hava valstað í høllini á Hálsi ella ikki kunnu møta valdagin, kunnu greiða brævatkvøðu á skrivstovuni í skúlanum á Fløtum til 11. november kl. 12.
Higartil eru hesi uppstillað
Annfríð Poulsdóttir Jørgensen
Erla Bech Nolsø
Heidi Davidsen
Kristianna Jústinesdóttir Heinesen
Kristian Niclasen
Poula Patursson
Súsanna Reinert-Petersen
Snorri Patursson
Val til skúlastýrið
Kunning frá Undirvísingarstýrium um valrætt til skúlastýrisval
Nú tað stundar til skúlastýrisval, er tað týdningarmikið at foreldur at børnum í skúlanum vita, um tey hava atkvøðurætt.
Hvør hevur atkvøðurætt?
Foreldur hava atkvøðurætt, um tey eru løggildu foreldur at barninum, sum gongur í skúlanum. Hetta merkir, at tað er neyðugt at hava foreldramyndugleika fyri at hava atkvøðurætt. Hetta eiga foreldur at vera kunnað um. Um tey eru í iva, um tey hava atkvøðurætt, er her ein máti at kanna, um mann hevur foreldramyndugleika/atkvøðurætt.
Havi eg sum foreldur atkvøðurætt?
Á Vanganum (app):
Far til "Vangamynd"
Niðast á síðuni stendur "Børn undir 18 ár"
Um barnið/børnini standa har, hevur tú foreldramyndugleika
Um tú ikki ert skrásett/ur rætt:
Vend tær til Familjufyrisitingina (um tú ert ógift/ur)
Vend tær til lokala prestin, um tú ert gift/ur
Báðir myndugleikar hava beinleiðis atgongd til fólkayvirlitið (FOLK) - Kervi er knýtt í FOLK
Møguligar misskiljingar
"Fráboðan av faðirskapi" og "fráboðan av avtalu um felags foreldramyndugleika" eru ikki tað sama
Tað seinna er neyðugt fyri at hava atkvøðurætt til skúlastýrisvalið
Týdningarmikið at minnast til:
Foreldur, sum eru í iva, eiga at kanna málið og venda sær til viðkomandi myndugleikar um neyðugt, so tey kunnu tryggja sær atkvøðurætt til skúlastýrisvalið.
Summarfrí
Vit eru farin í summarfrí.
Starvsfólk skúlans byrja aftur mánadagin 12. august kl. 8.00.
Næmingarnir møta aftur mikudagin 14. august kl. 9.00.
Vit ynskja øllum eina góða summarfrítíð.
Lærarastørv í Gulaskúla skúlaárið 24/25
Umsóknarfreistin er 12/06-24
Lærarastarv til Lopfjølina skúlaárið 24/25
Umsóknarfreistin er 12/06-24
Nýtt foreldraráð
Guliskúli hevur fingið nýtt foreldraráð.
Á fundi 12.03.24 skipaði foreldraráðið seg soleiðis
Forfólk: Poula Patursson
Varaforfólk: Páll Isholm
Nevndarlimir: Gunnvá Staksberg, Unn Højgaard á lað og Karolina Láberg
Vit ynskja teimum til lukku við valinum, og vit gleða okkum til eitt gott og mennandi samstarv.
Føstuhald
Føstuhaldið hjá Gulaskúla verður fríggjadagin 09/02-24.
Allir næmingar møta kl. 8.00.
Frá kl. 8.00 til kl. 10.00 eru næmingarnir í stovunum sum vanligt.
Kl. 10 verður tunnusláing.
Kl. 11 verður kappingin um vakrastu grýluna.
Kl. 11.30 bjóðar skúlin grýturætt og pasta.
Krea bjóðar næmingunum at gera føstulávintsmaskur hesa vikuna. Opið er í Krea frá kl. 10.00 til 13.00.
Kunning um Nám X
Hósdagin 01/02-24 var Joan Samuelsen (Varaskúlastjóri) og greiddi frá um Nám X.
Joan Samuelsen
Allir næmingar í 9. flokki hjá okkum, sum vóru áhugaði í Nám X, vóru við í Gulu stovu til kunning um, hvat Nám X er fyri nakað.
Joan greiddi okkum frá um breytirnar, ið næmingarnir kunnu velja.
Okkara næmingar hildu at har vóru sera nógvar breytir, ið tey høvdu áhuga í at velja, so ringt er at velja frá.
Freistin at søkja er 15. mars.
Breyt 1Breytirnar eru býttar upp í Breyt 1 og breyt 2.
Breyt 1 er 10 tímar og breyt 2 er eisini 10 tímar.
Breyt 1 hevur eitt ávíst úrval av lærugreinum (sí mynd) og breyt 2 hevur so eitt annað úrval av lærugreinum.
So samanlagt hevur Nám X næmingurin breytir 20 tímar um vikuna.
Sansarúmið klárt
Nú er sansarúmið í Gulaskúla klárt at taka í brúk til okkara næmingar.
Síðsta skúlaár settu starvsfólk sansarúm á ynskilistan til Gulaskúla.
Vit fóru spakuliga í gongd við at mála og gera rúmið klárt til brúk.
Vit søktu skótahjálpina um stuðul til verkætlanina, og játtaðu tey okkum peningaligan stuðul til verkætlanina.
Síðani hava starvsfólkini arbeitt hart fyri at gera alt klárt og bíleggja ymiskt til rúmið.
So fyrst í vikuni var klárt til at taka rúmið í brúk.
Næmingar hava roynt rúmið, og eru tey øll samd um, at hetta er fantastiskt.
Vit vilja enn einaferð takka Skótahjálpini fyri stuðulin.
SI 1
SI 2
SSP "Tryggari á netinum"
Hósdagin18/01-24 var SSP á vitjan í Gulaskúla.
Evnið var "tryggari á netinum"
Næmingar í 8. - 10. flokki vóru við til tiltakið.
Hetta var sera áhugavert og viðkomandi fyri okkum øll, og prátið gekk væl, og næmingarnir vístu stóran áhuga.
Á heimasíðuni www.ssp.fo kann man kunna seg um arbeiðið og endamálið hjá SSP.
Vit takka Jákup av Skarði fyri tiltakið.
Stuðul frá Skótahjálpini
Fyrr í ár søktu vit í Gulaskúla um peningaligan stuðul frá skótahjálpini til ger av sansarúmi í skúlanum.
Sansarúmið skal vera við til at stimbra sansirnar og dempa órógvið, sum summir næmingar hava í kroppinum
Við hjálp frá starvsfólkum og tólum, ið hoyra til slík rúm, skal hetta gera næmingarnar betri fyri at hugsavna seg.
Sigast má, at hjálpin var yvir allar vantanir. Skótahjálpin handaði okkum heili 75.000,00 kr. til at gera sansarúmið klárt.
Vit í Gulaskúla takka so inniliga fyri gávuna.
Jólamánaðurin
So hava næmingar og starvsfólk pynta skúlan, og er úrslitið framúr gott.
Her eru dagar tit skulu minnast til.
15. desember bjóða vit foreldrunum vælkomnum at vitja skúlan frá kl. 11.00 - 13.00. Vit bjóða tykkum ein drekkamunn og okkurt gott afturvið.
19. desember hava vit jólahugna við næmingunum.
20. desember møta vit kl. 9.00 í Gulaskúla. Síðani fara vit í kirkju kl. 10.30. Næmingarnir fáa jólafrí aftaná kirkjugongdina. Tað er umleið kl. 11.30.
Útiskúlin á ferð
Mikudagin 27/09 gekk leiðin til Kollafjarðar.
Tá ið vit komu til Kollafjarðar, var ein fótbóltsdystur floytaður í gongd ímillum Gulaskúla og Kollafjarðar skúla. Hendan dystin vann Guliskúli, so lagið var í topp hjá okkara leikarum.
Eftir dystin gekk leiðin niðan í Deyvahyl.
Veðrið var av tí fagrasta.
Summi dyppaðu og onnur funnu ró í náttúruni.
Tá ið liðugt var at dyppa, savnaðust øll í viðarlundini, har vit hugnaðu okkum við báli, sneisabreyði, skótakeks og kakao.
Vit takka fyri ein framúr góðan dag.
1. skúladagur skúlaárið 2023/24
Góðu næmingar og foreldur
Mikudagin 16/08-23 byrjar skúlin aftur.
Næmingarnir møta kl. 9.00 og endar dagurin kl. 12.00.
Tað er ikki útiskúli hendan dagin, men eru næmingarnir í flokkunum.
Vit gleða okkum at síggja tykkum.
Starvslýsing til Lopfjølina
1 lærari í tíðaravmarka starv, sí leinkju.
Gleðiligar páskir
Guliskúli vil ynskja øllum einar gleðiligar páskir.
Skúlin byrjar aftur 12/04-23 kl. 8.00.
Nýggjar enskar bøkur
Nýggj framsýning er sett fram í bókasavninum við nýggjum enskum bókum.
Hetta eru sera spennandi bøkur, sigur bókavørðurin.
Børn og ung dáma sera væl at lesa enskt tilfar, og tí hevur bókavørðurin bílagt nýggjar enskar bøkur til skúlabókasavnið.
Næmingar og foreldur eru vælkomin at hyggja nærri eftir bókum á bókasavninum.
Hunger Games
Nýtt næmingaráð
Í síðstu viku valdu skúlastovurnar í Gulaskúla umboð til næmingaráðið.
Í dag var so fyrsti fundur, har skúlaleiðarin greiddi frá, hvat næmingaráðið skal arbeiða við.
Eisini fingu tey at hoyra um ætlanir, ið eru í gongd á skúlanum.
Síðani skuldi næmingaráðið skipa seg, og úrslitið var hetta:
Formaður Jákup á Argjaboða
Næstformaður: Viljam Guttesen Johannesen
Skrivari: Rasmus
Nevndarlimir:
Eva H. Dalsgarð
Andreas Drangberg
Regin oman Tún
Dávid Petersen
Teitur Dam Jacobsen (Vantar á myndini)
Lukas Egholm Niclasen (Vantar á myndini)
Endamál:
Næmingaráðið hevur til endamáls at fremja felags áhugamál millum næmingarnar í Gulaskúla.
Tað er at síggja nýggjar møguleikar fyri skúlan, betra um trivnaðin millum næmingar, skipa fyri felags løtum, og geva starvsfólkum og leiðslu góð ráð um ymiskt, ið viðkemur næmingunum.
Vit eru sera spent uppá at byrja hetta arbeiðið, og gleða okkum til næsta fund.
Næsti fundur verður hósdagin 02/03 kl. 10.
Føstulávint
Í Gulaskúla eru vit við at gera klárt til Føstulávint.
Tunnan er keypt, og næmingar eru í fer við at mála tunnuna.
Mánadagin 20/02-23 møta næmingarnir sum vant kl. 8.00 grýluklæddir.
Vit fara øll at sláa tunnu og so verður okkurt lekkurt at fáa aftaná.
Í samband við føstulávint bjóðar Krea øllum næmingum á gátt at gera sína egnu føstulávintsmasku. Hetta verður hósdagin 16. og fríggjadagin 17. februar millum kl. 11 og 13.
Í Krea fáa næmingarnir eina masku, sum teir kunnu mála, líma og tekna mynstur og annað á.
Stutt um føstulávint
Føstulávint er upprunaliga eitt hátíðarhald fyri várinum.
Orðið Føstulávint er úr týskum og merkir føstuaftan, kvøldið fyri føstuna.
Øskudagur er mikudagur eftir føstuinngang.
Hildið verður, at siðurin við at baka føstulávintsbollar er úr týsklandi, frá uml. 1600. Bollarnir vóru tá hveitibollar uttan fyllu og teir vóru nevndi heisswecken.
Grýla er gamalt norrønt orð, sum sipar til eitt skrímsl. Í dag ganga børn grýlu frá hurð til hurð. Tá tey hava sagt, hvat tey eita, fáa tey bomm ella eitt oyra.
Tunnusláttur fer fram á føstulávint. Í felag sláa vit eina trætunnu við einum gassa, til hon smildrast og dettur niður. Tá er kattakongurin ella drotningin funnin
Fríggjadagshugni
Hvønn fríggjadag seinnapart hugna vit um næmingarnar og starvsfólkini í felagsrúminum.
Í Gulaskúla hava vit næmingar, ið eru komnir úr nógvum ymiskum skúlum, tí verður eitt miðvíst arbeiði gjørt, fyri at vit øll trívast og føla okkum sum part av einum góðum felagsskapi.
Tí hevur skúlin sett hugna á skemaðið fríggjadag seinnapart. Her eru næmingarnir við til at gera deiggj og baka vaflur til hvønn annan. Ímeðan summi baka, spæla onnur spøl og hanga út í felagsrúminum. Sjálvandi eru tey vaksnu við eisini.
Manga takk :)
Næmingar baka
Gleðilig jól
Guliskúli ynskir øllum eini gleðilig jól og gott nýggjár.
Skúlin byrjar aftur týsdagin 03/01*2023 kl. 8.00.
Jólavikan í Gulaskúla 2022
Mánadagin 19/12-22
Næmingarnir eru í skúla frá kl. 8.00 til 12.30.
- Møta í skúlanum kl. 8.00
- Við bussi í Steinatún.
- Havnar Bio til Avatar
- Øll liðug kl. 12.30.
Týsdagur 20/12-22
Næmingarnir eru í skúla frá kl. 8.00 - 13.00
- Jólahald í Gulaskúla
- Dansa um træið
- Jólapakkar
Mikudagur 21/12-22
Næmingarnir eru í skúla frá kl. 9.00 til 12.00
- Møta í flokkinum
- Fara í kirkju í Vesturkirkjuni
- Jólafrí eftir Guðstænastuna
- Næmingarnir skulu heintast við Vesturkirkjuna.
Jólalist
Hesa seinastu vikuna hava vit málað eitt jólatræ á eina stóra træplátu, sum stendur úti í felagsrúminum í Gulaskúla.
Hugskotið at mála eitt jólatræ fingu vit frá Hanusi skúlavørðinum, sum setti eina stóra træplátu klára til okkum uppi í smíðstovuni.
Fyrst gjørdu vit eina skitsu, sum eisini sæst á myndunum. Skitsan gjørdi, at tað var lættari hjá okkum at fara undir at mála stóru plátuna, sum er 2,4 m høg og 1,3 m breið.
Tá ið skitsan var liðug avgjørdu vit, hvørjar litir vit vildu brúka. Vit samdust um, at litirnir skuldu vera hvítt, grønt og svart. Fyri at fáa ymiskar nuansur av litunum blandaðu vit litirnar saman fyri at finna akkurát tann litin, ið vit ynsktu okkum.
Áðrenn vit byrjaðu at mála, teknaðu vit skitsuna á bakgrundina á træplátuna við blýanti.
Tá ið vit vóru lidnar at mála jólatræið, hildu vit, at myndin manglaði eitt sindur av spæli, og tí avgjørdu vit at stroya dropar á myndina við fingrunum, sum tit síggja.
Vit pyntaðu jólatræið við myndum frá útiskúlanum.
Samanumtikið hildu vit, at tað var stuttligt at mála á so stóra flatu og vilja fegnar royna hetta aftur,men tá skal motivið vera øðrvísi.
Heilsan
Anna og Janet :)
Navnabroyting
4 - 10 tilboðið er nú Guliskúli
Í september mánaði í ár sendi leiðslan umsókn til kommununa um navnabroyting.
Grundgevingarnar vóru, at skúlatilboðið á mannamunni verður kallað Guliskúli.
Harafturat er skúlatilboðið Guliskúli eitt konsept, ið er flutt inn í gamla Argja Skúla.
18. november samtykti Trivnaðarnevndin hjá Tórshavnar Kommunu at ganga umsóknini á møti.
Vit í skúlanum takka trivnaðarnevndini fyri at hava játtað okkum hetta.
Bókadagar 16. - 20. november
Aftur í ár verður skipað fyri bókadøgum í Norðurlandahúsinum.
Tey skriva soleiðis um tiltakið:
"Bókadagar eru eitt afturvendandi tiltak, sum verður fyriskipað í samstarvi við m.a. føroyskar rithøvundar, forløg og felagsskapir. Her koma vit heilt tætt at tí góðu søguni, fáa nýggja vitan úr bókmentaheiminum og kenna nærleikan, sum fæst við at lesa eina góða bók."
Hetta er heilt vist vert at vitja.
Skráin kann lesast á hesari leinkjuni https://www.nlh.fo/fo/tiltoek/bokadagar-2022
Mín jólabók 2022
Nú ber til at bíleggja Mín jólabók 2022.
Í bókini eru nógvar søgur, stuttligar yrkingar, flottar tekningar og øðrvísi ítriv at hugna sær við.
Bókin er býtt upp í 24 partar, so okkurt er at gera hvønn dag fram til jólaaftan.
Bókin kostar 220 kr. og kann bíleggjast á jolabokin.fo
Skalt tú vissa tær bókina áðrenn 1. desember, so er síðsta freist at bíleggja 15. november.
Útiskúli
Mikudagur er útiskúladagur í Gulaskúla.
Mikudagar møta børnini sum vanligt í skúlanum. Aftaná fyrsta tíma, verður farið út at vitja støð, ganga túrar og gera alt møguligt uttandura.
Mikudagin 02/11-22 var útiskúlin uppi í Hoyvíkini. Gingið var fram við Boðanesi, har onkur royndi seg við tráðuni, og onnur klatraðu í grótbrotinum.
Síðani var gingið oman í Hoyvíkina, har tey flestu fingu okkurt slag av karmi, onkur við at dippa og onkur rann undan alduni. Gott og mennandi fyri sansirnar.
Aftaná hitaði Birgir kakao, so øll kundu fáa hita í kroppin aftur.
Síðani var gingið fram við Kúrbergi niðan í rundkoyringina við Hvítanes, haðani vit tóku bussin heim í skúlan aftur.
Ársins ADHDviðurkenning
Súni Jacobsen hevur í dag fingið handað ársins ADHDviðurkenning.
Tað var ein samd nevnd, ið avgjørdi, at Súni Jacobsen skuldi hava ADHDviðurkenningina í 2022.
Súni var við at seta Gulaskúla á stovn og hevur starvast her, síðani tilboðið byrjaði sum ein royndarverkætlan í 2009. Hann hevur hjálpt nógvum børnum og ungum við ADHD og foreldrum teirra í skúlaskipanini.
Súni hevur saman við øðrum bygt Gulaskúla av góðvilja og einum vilja at røkka tí einstaka barninum, har tað er, og sum tað er. Tað menniskjansliga er útgangsstøðið hjá Súna.
Hjartaliga til lukku, Súni.
Øll greinin kann lesast her https://adhd.fo/greinar/2022/adhdvidurkenningin-2022/