Inklusjónsgrundarlag fyri Skúlan á Fløtum 

 

Ein góður skúli er ein inkluderandi skúli - og ein inkluderandi skúli er ein góður skúli.

Rasmus Alenkær

 

Skúlin á Fløtum leggur dent á dygd í inklusjónini. Dygd merkir, at tað skal vera gagnligt hjá tí einstaka og felagsskapinum. Við hesum hugsunarhátti er neyðugt at taka støðu til, hvar markið gongur millum dygd og ikki. Somuleiðis, hvat er gagnligt og ikki. Gagnligt er eisini heitið, sum verður brúkt í §14 í kunngerðini um førleikastovur. 

Lars Qvortrup tosar um trý sløg av inklusjón, og hvørjar treytir mugu vera uppfyltar, fyri at talan skal vera um inklusjón og ikki eksklusjón: 

  • Fysiska inklusjón – er næmingurin í flokkinum ella í øðrum tilboði? 
  • Sosiala inklusjón – tekur næmingurin virknan lut í felagsskapinum ella ikki? 
  • Sálarlig inklusjón – kennir næmingurin seg viðurkendan av felagsskapinum, ella er næmingurin bara toldur millum floksfelagarnar? (Qvortrup & Qvortrup, 2015, s. 87) 

Á Skúlanum á Fløtum verður arbeitt við ymiskum inklusjónshættum, sum tilsamans kunnu brúkast til at gera eina meting av, um eitt barn er innkluderað.  

Mið og mál skúlans byggir á grundtættirnar trivnað, treysti og áræði, og aðalmálið hjá skúlanum er lærdómur. Trivnaður, samstarv og felagsskapur eru megintættir í allari læru, og tí eru hesi flættað í okkara mentan.

Í Skúlanum á Fløtum vilja vit hava eina mentan og hugburð, sum byggir á viðurkennandi, gott og førleikaskapandi barna- og menniskjasýni. Vit vilja rúma øllum næmingum í skúlanum á bestan hátt, málið er eisini at tryggja, at næmingarnir við serligum avbjóðingum fáa eitt viðkomandi og skikkað undirvísingartilboð. Tá ið vit møta næmingum, sum bera seg óhóskandi at, er hetta tí tey verða møtt av krøvum, tey ikki hava førleikar at megna. Her má toymið um barnið tillaga undirvísingina, væntanir og krøvini, ið verða sett næminginum. 

Førleikastovan tekur sær av teimum næmingunum, ið hava tørv á hjálp, bæði fakligari og trivnaðar-ligari.

Førleikastovan kann saman við serlærarunum seta tiltøk á skrá, sum skulu virka fyri at stuðla undir og menna eitt næmingalagað og innkludernadi skúlaumhvørvi, har allir næmingar fáa møguleika at mennast og læra og fáa høvi at vera virknir í felagsskapinum. 

Í Skúlanum á Fløtum leggja vit stóran dent á gott samstarv millum skúla og heim. Vit leggja dent á, at tað hevur stóran týdning at møta til tiltøk, ið skúlin ella flokstoymi skipa fyri.  

Í miðum og málum skúlans er endamálið í samstarvi við heimið at skipa eitt fjølbroytt og samanhangandi skúla- og frítíðarskúlatilboð frá forskúla til loknan fólkaskúla á føroyskum grundvølli.

Vit arbeiða málrættað við at skapa góðar relatiónir millum børnini, soleiðis at øll kenna seg sum part av felagsskapinum. 

Office 365
Matpakkin
K-skíggi
I-bók
Flokkar