Tíðindi

Fremsti føroyski rúmdargranskarin eitur David Arge Klevand Pedersen. Hann hevur gingið í framhaldsdeldini í Kommunuskúlanum, og tá fekk hann áhuga fyri tøkni, ið hann hevði sum lærugrein í skúlanum. At lodda, seta saman, fáa at lýsa, surra o.s.fr. kveikti hugini, ið seinni flutti seg út í rúmdina -  í løtuni Mars. David arbeiðir á  DTU Space,  og hann hevur gjørt vart við seg í alheims miðlum, síðani NASA setti marsbilin,  Perseverance Rover,  á okkara grannagongustjørnu. Leiklutur hansara hevur verið at menna myndatólið, sum nú leitar eftir lívi á reyðu gongustjørnuni. Og nú hevur hann vitjað Skúlan  á Fløtum;  á ein hátt hansara fyrrverandi fólkaskúli, hóast hann ikki ber saman navn í dag.    

Næmingarnir í hádeildini sótu við andakt og lurtaðu í gjár, meðan ungi føroyski granskarin og fyrrverandi næmingurin  greiddi frá spennandi verkætlanini, sum umvegis hann sjálvan og Tindhólm, hevur knýtt føroyingar og skúlan at gongustjørnuni Mars. Partur av tøknini, sum nú eru uppi á Mars, er nevniliga royndur í Tindhólmi, áðrenn hon var sent út í rúmdina.