Tíðindi

Um veturin liggur Westward Ho vanliga fyri teymi og undir dúki ella á sleipistøð, meðan sluppvinir og handverkarar gera ymiskt viðlíkahald. Samstundis verða ætlanirnar lagdar fyri virksemið komandi summarhálvuna.

Nøkur tiltøk eru afturvendandi. Eitt av teimum er  at skipa fyri fiskikapping millum allar 6. flokkar í Tórshavnar kommunu. 6. flokkarnir í Skúlanum á Føtum eru í hesum døgum partur í tiltakinum og skiftast um at vera í fjørðinum við Sluppini.

Eir er ein av lærarunum, sum hevur verið ein túr við sínum næmingum. Hon letur væl at: Tey fóru avstað í dýrdarveðri, sólin skein yvir kyrran fjør, ein glaður vónríkur hópur, sum væntaði sær fong. ”Fiskur á, fiskur á”, jú tey drógu ikki svart,  fingu okkurt um 78 fiskar. Ein næmingur fekk ein tosk, ið vigaði 8 pund!

“Superfiskarar” løgdu at landi, raskir og glaðir við  einum  fullum kassa  av fiski. Frálíkur veiðidagur.
 
Keldur: EVE, torshavn.fo
Myndir: EVE