Tíðindi

Fyrsti dystur millum fótbóltsrásirnar í Skúlanum á Fløtum og Skúlanum við Løgmannabreyt var á ovara vølli  í Gundadali í morgun.  Spælt varð tvær ferðir 25 minuttir

Góðir leikarar í báðum liðum, sum ídnir stríddust fyri steypinum. Á heimasíðuni hjá Skúlanum við Løgmannabreyt skriva tey m.a. soleiðis um dystin:

“Javnt gekk á leingi, men í endanum á fyrra hálvleiki legði SAF seg fram um. Nakað inn í seinna hálvleik javnaði SVL og rómurin frá SVL áskoðarunum var øgiligur. Nú var háspenningur í luftini.

Men so fekk SAF tvey tøtt  mál, alt tóktist at vera avgjørt. Tó megnaði SVL at svara aftur og eina góða løta stóð 2-3. Í tíðini, dómarin hevði lagt afturat, fóru allir SVL leikararnir í álop, eisini málmaðurin og stórt trýst var lagt á SAF málið. Men inn fór bólturin ikki. 

Og so hendi tað, sum so ofta hendir í slíkum støðum. Skotini duna í móti málinum, men so einaferð, endar bólturin úti á miðjuni, her ein einsamallur áleypari bíðar. Og júst tað hendi og soleiðis kundi SAF áleypari renna hálvuna einsamallur og trilla bóltin í tómt mál.

Samanumtikið var góður hýrur á bæði leikarum og áskoðarum, sum heilt týðiliga hugnaðu sær saman.”

Dysturin endaði við 4-2 sigri til okkum á Fløtum. Málini skoraðu Silas, Silja, Benjamin B og Rasmus.  Fyri Løgmannabreyt skoraðu Dánjal Mørkøre og Jógan í Lon.  Áskoðaraplássini vóru mannað við hópi av næmingum úr báðum skúlum.

Allan er lærari í fótbóltsrásini, og hann er sera væl nøgdur til dystin, sum var kryddaður við øgiligum  gleimi frá fjepparunum úr báðum skúlum. Eitt tiltak, sum avgjørt verður afturvendandi, sigur Allan.

Les eisini um dystin á heimasíðuni í Skúlanum á Løgmannabreyt HER.

Myndir og upptøka: ATÚ
Keldur: ATU og heimasíðan hjá Skúlanum við Løgmannabreyt