Tíðindi

“Lego er komið úr Danmark. Lego merkir spæl væl á donskum. Lego varð uppfunnið av einum manni, ið eitur Ole Christiansen  í 1932. Legoland liggur í Billund, tí tað var  har Ole Christiansen búði....”

Heimasíðan er á vitjan í 3.a, og orðini omanfyri er inngangurin í eini væl frágingnari  framløgu um heimskendu donsku leikakubbarnar. Seinastu vikuna hava næmingarnir í 3.a nevnliga  lært um, hvussu framløgur skulu gerast og hvørji amboð kunnu nýtast í tí sambandi. Eyðsýnt er, at Askur er øgiliga væl fyrireikaður, hann veit ein hóp um evnið, og dugir væl at gera tað spennandi.

“Í Føroyum eru 150 sløg av firvaldum, og í øllum heiminum eru 150.000. Ein firvaldur er fyrst egg, so ormvera, so reivvera og so endiliga firvaldur...,” ljóðar boðskapurin frá Natasju og Beru, sum nú hava orðið. Nógv nýtt og áhugavert er at fáa at vita frá teimum báðum, og hinir næmingarnir sita sum á nálum og lurta. "Takk fyri at tit lurtaðu," soleiðis enda tær sína framløgu.

Væl nøgd stýrir Annvør flokslærari framløgunum, sum hesir ungu næmingarnir royna á fyrsta sinni. Øll skulu leggja fram, og tey næstu skulu nú framat, men onkur tøknilig avbjóðing er við at opna powerpointið. “Tað er ikki verri enn so,”  sissar flokslærarin ótolnu næmingarnar, “vit finna út av tí í morgin, um tað ikki vil lata seg upp í dag...”

Heimasíðumaðurin vendur aftur til sítt pláss á bókasavninum og framløgurnar við fjølbroyttum og spennandi evnum halda fram. Okkurt verður um hundar, okkurt um uppfunnar verur og okkurt annað við. 

Myndir: ani&jvú